चिचगडमध्ये भरधाव कार अन् दुचाकीची समोरासमोर भीषण धडक; तरुणाचा दुर्दैवी मृत्यू, एकजण गंभीर!

महामार्ग क्र. ५४३ वरील पॉवर हाऊसजवळील घटना : मोहगाव येथील एकाच कुटुंबातील दोघांवर काळाचा घाला; गंभीर जखमीवर रुग्णालयात उपचार सुरू
चिचगड/देवरी (गोंदिया) : देवरी तालुक्यातील चिचगड येथील पॉवर हाऊसजवळ राष्ट्रीय महामार्ग क्रमांक ५४३ वर भरधाव स्विफ्ट कार आणि दुचाकी यांच्यात समोरासमोर झालेल्या भीषण अपघातात दुचाकीस्वार तरुणाचा जागीच दुर्दैवी मृत्यू झाला, तर दुसरा तरुण गंभीर जखमी झाला. हा भीषण अपघात बुधवार, २१ ऑक्टोबर रोजी सकाळी ११:४० वाजेच्या सुमारास घडला. ऐन दिवाळी-दसरा सणांच्या दिवसांत घडलेल्या या हृदयद्रावक घटनेमुळे मोहगाव परिसरावर शोककळा पसरली आहे. शुभम कृष्णा उईके (वय २८, रा. मोहगाव, ता. देवरी) असे अपघातात दगावलेल्या दुर्दैवी तरुणाचे नाव आहे. तर रमेश भीमराव उईके (वय ३०, रा. मोहगाव) हा गंभीर जखमी झाला असून त्याच्यावर रुग्णालयात उपचार सुरू आहेत.
सविस्तर वृत्त असे की, शुभम उईके आणि रमेश उईके हे दोघे आपल्या दुचाकीने (क्रमांक CG-08/AP-2920) काही वैयक्तिक कामानिमित्त चिचगडच्या दिशेने जात होते. दरम्यान, चिचगड येथील पॉवर हाऊसजवळ पोहोचताच देवरीच्या दिशेने सुसाट वेगाने येणाऱ्या स्विफ्ट कारने (क्रमांक MH-35/AG-6410) त्यांच्या दुचाकीला समोरासमोर जोरदार धडक दिली. धडक इतकी भीषण होती की, दुचाकीवरील दोघेही हवेत उडून रस्त्यावर आदळले आणि रक्ताच्या थारोळ्यात पडले. अपघातात दुचाकीचा अक्षरशः चक्काचूर झाला.
रुग्णालयात नेत असतानाच वाटेत सोडले प्राण
अपघाताचा मोठा आवाज ऐकून परिसरातील नागरिकांनी तत्काळ घटनास्थळाकडे धाव घेतली. गंभीर जखमी झालेल्या शुभम याला रुग्णवाहिकेतून तातडीने चिचगड येथील ग्रामीण रुग्णालयात हलविण्यात येत होते; मात्र वाटेतच त्याची प्राणज्योत मालवली. ग्रामीण रुग्णालयातील डॉक्टरांनी तपासून त्याला मृत घोषित केले. या अपघातात गंभीर जखमी झालेल्या रमेश उईके याच्या हाता-पायाला गंभीर फ्रॅक्चर झाले असून, त्याच्यावर चिचगड ग्रामीण रुग्णालयात उपचार सुरू आहेत.
या अपघाताची माहिती मिळताच चिचगड पोलिसांनी घटनास्थळी पोहोचून पंचनामा केला. पोलिसांनी दोन्ही वाहने ताब्यात घेतली असून, या घटनेची नोंद चिचगड पोलीस ठाण्यात करण्यात आली आहे. अपघाताचे नेमके कारण काय होते, याचा पुढील तपास चिचगड पोलीस करत आहेत. अवघ्या २८ वर्षांच्या शुभमच्या अचानक जाण्याने उईके कुटुंबावर दुःखाचा डोंगर कोसळला आहे.