दुष्काळग्रस्त परिस्थितीतही रबी पिकावर कोणतीही बंदी नाही; प्रति हेक्टर १० हजार रुपयांची मदत मिळणार: आमदार विनोद अग्रवाल

गोंदिया : गोंदिया विधानसभा क्षेत्राचे आमदार विनोद अग्रवाल यांनी सोशल मीडियावर एक व्हिडिओ संदेश जारी करून जिल्ह्यातील शेतकऱ्यांना दुष्काळग्रस्त परिस्थितीबाबत पसरवल्या जाणाऱ्या अफवांपासून सावध राहण्याचे आवाहन केले आहे. तसेच रबी हंगामाबाबत स्पष्ट माहिती देत शेतकऱ्यांच्या मनातील संभ्रम दूर केला आहे.आमदार अग्रवाल यांनी आपल्या संदेशात स्पष्ट केले की, अनेक शेतकऱ्यांच्या मनात दुष्काळामुळे रबी पिकाबाबत संभ्रम निर्माण झाला आहे. मात्र, कोणताही शेतकरी रबी पीक लावू शकतो आणि यावर सरकारने कोणतीही बंदी घातलेली नाही. उलट, सरकार रबी धान किंवा पीक लावण्यासाठी प्रति हेक्टर १० हजार रुपयांची स्वतंत्र मदत देणार असून शेतकऱ्यांना नुकसानभरपाईसुद्धा पूर्ण मिळेल. नुकसानभरपाई मिळणे म्हणजे धान खरेदी होणार नाही, असे नसून दोन्ही सुविधा शेतकऱ्यांना उपलब्ध करून दिल्या जातील.कमी पाण्याची पिके लावण्याचे आवाहन व प्रकल्पांमधून पाणी:या वर्षीची पाण्याची स्थिती पाहता शेतकऱ्यांनी कमी पाणी लागणारी पिके लावणे जास्त हिवाळ्याचे राहील, असे सांगतानाच त्यांनी स्पष्ट केले की, शेतकऱ्यांना जर धान पिकाची लागवड करायची असेल, तर तेही ते करू शकतात. कोणत्याही पिकावर कोणतीही बंदी नाही. तसेच इटियाडोह, बाघ प्रकल्प आणि इतर प्रकल्पांमध्ये पिण्याच्या पाण्याचा हिस्सा वगळता उर्वरित पाणी निश्चितपणे शेतकऱ्यांना रबी सिंचनासाठी उपलब्ध करून दिले जाईल. विज कापण्यासारखा कोणताही शासकीय निर्णय झालेला नाही आणि कोणाचीही वीज कापली जाणार नाही, असेही त्यांनी ठामपणे सांगितले.नवीन बोअरवेलवर निर्बंध, मात्र घरगुती बांधकामास परवानगी:नवीन बोअरवेल (घरगुती वगळता) खोदण्यावर सध्या बंदी असून याबाबत सरकार विचार करत आहे. मात्र, जुने बोअरवेल आणि विद्यमान जलस्रोतांमधून रबी पीक सहज लावता येईल. पिण्याच्या पाण्यासाठी घरात बोअरवेल खोदता येईल आणि कोणत्याही प्रकारचे बांधकाम करता येईल, असे स्पष्ट करत जिल्ह्यात यावर कोणतीही बंदी नसल्याचे त्यांनी नमूद केले.धान खरेदी व कर्जमाफीबाबत दिलासा:धान खरेदीबाबत आश्वासन देताना आमदार अग्रवाल म्हणाले की, प्रति सेंटरवर प्रति एकर किमान १४ क्विंटल आणि साधारणतः १५ ते १६ क्विंटलपर्यंत धान खरेदी केली जाईल. याशिवाय, २०१७ मध्ये कर्जमाफीपासून वंचित राहिलेल्या शेतकऱ्यांचे कर्ज माफ करण्याचा निर्णयही सरकारने घेतला असून जे शेतकरी नियमित कर्ज भरत आहेत, त्यांना प्रोत्साहन रक्कम देखील मिळेल. यासाठी थोडा वेळ लागू शकतो, त्यामुळे शेतकऱ्यांनी धीर धरावा, असे आवाहन त्यांनी केले. आपण पूर्णपणे शेतकऱ्यांच्या पाठीशी असून कोणत्याही अफवांना बळी पडू नये, असे त्यांनी शेवटी म्हटले.