महावितरणचा अजब-गजब कारभार; घरात फक्त एक पंखा अन् दोन बल्ब, बिल पाठवले ११,४१० रुपये!

राजूरा तालुक्यातील भुरकुंडा येथील धक्कादायक प्रकार; वीज कापण्याच्या धमक्यांमुळे मजूर कुटुंब चिंतेत
राजूरा : तालुक्यातील भुरकुंडा गावात वीज विभागाच्या भोंगळ कारभाराचा एक अत्यंत चकित करणारा प्रकार समोर आला आहे. गावातील शेतमजूर विठ्ठल कोटरंगे यांच्या घरात केवळ एक पंखा आणि दोन लाईट (बल्ब) असतानाही महावितरणने त्यांना तब्बल ११,४१० रुपये इतके भरमसाठ वीज बिल धाडले आहे.
विठ्ठल कोटरंगे हे शेतात मजुरी करून आपल्या कुटुंबाचा उदरनिर्वाह चालवतात. या महागाईच्या काळात दोन वेळच्या भाकरीची सोय करणे जिथे कठीण झाले आहे, तिथे महिन्याभराच्या कमाईपेक्षा जास्त रक्कमेचे वीज बिल हातात पडल्याने कोटरंगे कुटुंबाचे होश उडाले आहेत.
वीज कनेक्शन कापण्याची धमकी!
“महिन्याची एकूण कमाई ११ हजार रुपयेसुद्धा नाही, मग एवढी मोठी रक्कम एकाच वेळी कुठून भरणार?” असा सवाल विठ्ठल कोटरंगे यांनी उपस्थित केला आहे.
एवढेच नव्हे तर, महावितरणचे कर्मचारी वारंवार घरी येऊन बिल न भरल्यास वीज पुरवठा खंडित करण्याची (कनेक्शन कापण्याची) धमकी देत आहेत. त्यामुळे वीज कापली जाण्याच्या भीतीपोटी हे मजूर कुटुंब सातत्याने मानसिक तणावाखाली जगण्यास भाग पडले आहे.
नागरिकांचा आंदोलनाचा इशारा
गलथान कारभार वीज विभागाच्या कर्मचाऱ्यांचा असताना त्याची शिक्षा सामान्य जनतेला का दिली जात आहे? असा संतप्त सवाल ग्रामस्थांनी विचारला आहे.
संबंधित विद्युत विभागाने आणि प्रशासनाने या संपूर्ण प्रकरणाची तात्काळ दखल घेऊन विठ्ठल कोटरंगे यांना पाठवलेले चुकीचे व अवाजवी वीज बिल तात्काळ दुरुस्त करावे, अशी मागणी जोर धरू लागली आहे. वीज बिलात लवकर दुरुस्ती न झाल्यास रस्त्यावर उतरून तीव्र आंदोलन छेडण्याचा इशारा स्थानिक नागरिकांनी दिला आहे.