शेतातील अवैध वीज प्रवाहाचा स्पर्श होऊन ४५ वर्षीय शेतकऱ्याचा करुण अंत!

सडक अर्जुनी तालुक्यातील खोडशिवनी येथील धक्कादायक घटना
डुग्गीपार पोलिसांत दोघांवर गुन्हा दाखल
सडक अर्जुनी (गोंदिया): शेतातील पिकाला पाणी देण्यासाठी महावितरणच्या विजेच्या खांबावरून बेकायदेशीरपणे थेट जोडलेल्या (डायरेक्ट करंट) उघड्या तारेचा स्पर्श झाल्याने एका ४५ वर्षीय शेतकऱ्याचा जागीच तडफडून मृत्यू झाल्याची संतापजनक घटना खोडशिवनी परिसरात उघडकीस आली आहे. ७ ते ८ ऑक्टोबरच्या दरम्यान सकाळी ९ वाजेच्या सुमारास ही घटना घडली.
योगराज माधवराव कावगते (वय ४५, रा. खोडशिवनी, ता. सडक अर्जुनी) असे मृत पावलेल्या दुर्दैवी शेतकऱ्याचे नाव आहे.
जीवितहानीची जाणीव असतानाही अक्षम्य निष्काळजीपणा!
प्राप्त माहितीनुसार, आरोपी जयदेव कुशन पुस्तोडे (वय ५६) आणि कृष्णकांत जयदेव पुस्तोडे (वय २९, दोघेही रा. खोडशिवनी) यांनी आपल्या शेतातील धानाला पाणी देण्यासाठी विजेच्या खांबावरून थेट वायर जोडून मोटार पंप सुरू केला होता. या उघड्या वायरमुळे कोणताही गंभीर अपघात होऊन कोणाचाही जीव जाऊ शकतो याची पूर्ण जाणीव असतानाही त्यांनी गंभीर निष्काळजीपणा केला. मृत योगराज कावगते हे आरोपींच्या बटईने करत असलेल्या शेतात गवत काढण्यासाठी गेले असता, त्यांचा पाय किंवा हात या चालू वीजप्रवाहाच्या उघड्या वायरला लागला आणि जागीच त्यांचा अंत झाला.
डुग्गीपार पोलिसांत गुन्हा दाखल; तपासाला गती
या प्रकरणी मृतकाचे नातेवाईक विलास यादवराव कापगते (वय ४७) यांनी दिलेल्या फिर्यादीवरून डुग्गीपार पोलीस ठाण्यात आरोपी जयदेव पुस्तोडे आणि कृष्णकांत पुस्तोडे यांच्याविरोधात गुन्हा नोंदवण्यात आला आहे. घटनेचे गांभीर्य लक्षात घेऊन डुग्गीपार पोलिसांनी घटनास्थळाचा पंचनामा केला असून, सहाय्यक पोलीस निरीक्षक (सपोनि) शेख हे या प्रकरणाचा पुढील सखोल तपास करत आहेत. या घटनेमुळे खोडशिवनी परिसरात हळहळ व्यक्त केली जात असून शेतातील बेकायदेशीर वीज जोडण्यांवर कारवाई करण्याची मागणी होत आहे.