विद्यार्थ्यांच्या जिवाशी खेळ: भंडाऱ्यात अवैध इमारतींमध्ये कोचिंग क्लासेसचा सुळसुळाट; फायर सिस्टीमही बेपत्ता!

नगर परिषद मुख्याधिकाऱ्यांची धडक मोहीम; नियम धाब्यावर बसवणाऱ्या संस्थांना नोटीस, ७ दिवसांत उत्तर न दिल्यास इमारती होणार सील
भंडारा / तुमसर (२५ जून): दोन दिवसांपूर्वी लखनऊ येथे झालेल्या भीषण अग्निकांडात १५ जणांचा होरपळून मृत्यू झाल्याची घटना ताजी असतानाच, भंडारा शहरातही विद्यार्थ्यांच्या सुरक्षेचा गंभीर प्रश्न ऐरणीवर आला आहे. नगर परिषदेचे मुख्याधिकारी जुम्मा प्यारेवाले यांच्या नेतृत्वाखालील पथकाने २४ जून रोजी शहरातील कोचिंग क्लासेसच्या इमारतींची अचानक तपासणी केली. या मोहिमेत अनेक नामवंत कोचिंग क्लासेस अवैध इमारतींमध्ये आणि कोणतीही अग्निशमन यंत्रणा (फायर सिस्टीम) नसताना सुरू असल्याचे धक्कादायक वास्तव समोर आले आहे. याप्रकरणी नियम मोडणाऱ्या इमारत मालकांना आणि संस्थाचालकांना न.प. प्रशासनाने कडक नोटीस बजावली आहे.
ट्यूशन गल्लीत पोलिसांची धडक; कागदपत्रांची तपासणी
मुख्याधिकारी जुम्मा प्यारेवाले आणि त्यांच्या पथकाने शहरातील मुख्य ‘ट्यूशन गल्ली’मधील व्यावसायिक इमारतींना भेटी दिल्या. यादरम्यान त्यांनी मलन टॉवर, स्पार्क क्लासेस, गिरेपुंजे इंग्लिश क्लासेस, महालकार फिजिक्स क्लासेस, आयडियल मॅथ अकॅडमी, कॅटेलायझर क्लासेस आणि शिक्षा क्लासेस या संस्थांमध्ये झाडाझडती घेतली. येथे विद्यार्थ्यांची बसण्याची क्षमता, आपत्कालीन परिस्थितीत बाहेर पडण्याचे रस्ते, अग्निशमन दलाच्या गाड्या पोहोचण्यासाठी पुरेशी जागा, विद्युत उपकरणे आणि बांधकाम मंजुरीची कागदपत्रे तपासण्यात आली. अनेक इमारती रस्त्याच्या कडेला अनियमित आणि विनापरवाना बांधल्या गेल्याचे निष्पन्न झाले आहे.
सात दिवसांचा अल्टिमेटम; अन्यथा वीज कापून इमारत होणार सील!
महाराष्ट्र आग प्रतिबंधक व जीवसंरक्षक उपाययोजना अधिनियम २००६ च्या कलम ३ अन्वये न.प. पथकाने या अवैध इमारतींना कलम ६ अंतर्गत नोटीस बजावली आहे. नोटीस मिळाल्यापासून ७ दिवसांच्या आत योग्य उपाययोजना करून लेखी उत्तर सादर न केल्यास, कलम ८ नुसार संबंधित इमारतींचा वीजपुरवठा खंडित करून त्या तात्काळ ‘सील’ करण्यात येतील, असा सज्जड दम न.प. प्रशासनाने दिला आहे. या कारवाईत नगर रचनाकार पवन कनोजे, अग्निशमन अधिकारी समीर गणवीर यांच्यासह इतर अधिकारी सहभागी होते.
तुमसर शहरातही पालकांची चिंता वाढली; फायर ऑडिटवर प्रश्नचिन्ह!
भंडाऱ्यासोबतच तुमसर शहरातही कोचिंग क्लासेसच्या सुरक्षेवरून पालकांमध्ये भीतीचे वातावरण आहे. तुमसर शहरात स्पर्धा परीक्षा आणि शालेय शिक्षणाचे सुमारे १२ ते १५ कोचिंग क्लासेस सुरू आहेत. मात्र, शहरात नेमके किती क्लासेस अधिकृत आहेत, याची ठोस माहिती न.प. प्रशासनाकडेच उपलब्ध नसल्याचे उघड झाले आहे. नियमानुसार दरवर्षी व्यावसायिक इमारतींचे ‘फायर ऑडिट’ करणे बंधनकारक असताना, अनेक इमारतींमध्ये अग्निशमन यंत्रेच लावलेली नाहीत. अशा बेजबाबदार इमारत मालकांवर कडक कारवाई होत नसल्याने मोठी दुर्घटना घडण्याची शक्यता वर्तवली जात आहे.
कडक कारवाई करणार!
“शहरातील कोचिंग क्लासेसची सुरक्षा व्यवस्था आणि फायर ऑडिटच्या स्थितीची सखोल चौकशी केली जाईल. ज्या संस्थांमध्ये त्रुटी किंवा नियमांचे उल्लंघन आढळेल, त्यांच्यावर कडक कायदेशीर कारवाई केली जाईल.”
— मंगेश वासेकर, प्रभारी मुख्याधिकारी, नगर परिषद तुमसर.