भंडाऱ्यात मानव-वन्यजीव संघर्ष विकोपास; वाघाच्या हल्ल्यात तरुण बांधकाम ठेकेदार ठार

गराडा जंगलातील हृदयद्रावक घटना; कामावरून परतताना घात
मानेगाव (बाजार) / भंडारा : जिल्ह्यात मानव-वन्यजीव संघर्ष दिवसेंदिवस तीव्र होत चालला असून, एका दुर्दैवी घटनेत वाघाच्या हल्ल्यात २८ वर्षीय तरुण जागीच ठार झाल्याची अत्यंत संतापजनक व शोककळा आणणारी घटना घडली आहे. भंडारा तालुक्यातील मानेगाव बाजारजवळील गराडा जंगल शिवारात २६ ऑक्टोबर रोजी संध्याकाळी ६ वाजताच्या सुमारास ही थरारक घटना घडली. या हल्ल्यामुळे परिसरात तीव्र संताप आणि भीतीचे वातावरण पसरले आहे.
सविस्तर माहितीनुसार, बासोरा येथील निवासी अमित भीमराव राऊत (२८) हा तरुण एक बांधकाम ठेकेदार म्हणून कार्यरत होता. नेहमीप्रमाणे तो आपले दिवसभराचे काम आटोपून पहेला-गराडा मार्गे आपल्या स्वगावी परतत होता. त्याच्यासोबत इतर चार-पाच सहकाऱ्यांचा ग्रुपही होता. दरम्यान, गराडा जंगल परिसरातील पहाडी मार्गावर दबा धरून बसलेल्या हिंस्र वाघाने अचानक अमित राऊत याच्यावर जीवघेणा हल्ला केला.
सहकाऱ्यांनी वाचवला जीव, पण अमित वाघाच्या तावडीत
अचानक समोर महाकाय वाघ आल्याने अमितसोबत असलेल्या सर्वांचीच भंबेरी उडाली. जीव वाचवण्यासाठी प्रत्येकाने सैरावरा पळ काढला; मात्र वाघाने अमित राऊतला आपल्या मजबूत तावडीत अडकवले आणि भीषण हल्ला चढवला. या झटापटीत आणि गंभीर दुखापतीमुळे अमितचा जागीच मृत्यू झाला.
गावकऱ्यांचा आक्रोश; प्रशासकीय अधिकारी घटनास्थळी दाखल
घटनेची माहिती वाऱ्यासारखी परिसरात पसरताच बासोरा व आजूबाजूच्या गावांतील ग्रामस्थ, नागरिक आणि मृतकाचे कुटुंबीय यांनी तातडीने घटनास्थळाकडे धाव घेतली. घटनेचे गांभीर्य लक्षात घेता, वनपरिक्षेत्र अधिकारी विलास बेलखोडे आपल्या ताफ्यासह तर कारधा पोलीस ठाण्याचे पोलीस निरीक्षक त्र्यंबक गायधने, मार्कंड डोरले, संदिप केंद्रे व पोलीस पथक तत्काळ घटनास्थळी दाखल झाले. पोलिसांनी पंचनाम्याची कायदेशीर प्रक्रिया पूर्ण करून मृतदेह उत्तरमृत्यूपरीक्षणासाठी (शवविच्छेदन) सामान्य रुग्णालय, भंडारा येथे रवाना केला.
हसत्याखेळत्या कुटुंबावरन दुःखाचा डोंगर
मृतक अमित राऊत याच्या पश्चात आई-वडील, पत्नी आणि दोन लहान मुलगे असा सुखी परिवार आहे. कुटुंबाचा कर्ता पुरुष व एकमेव आधार अचानक अशा रीतीने निघून गेल्याने बासोरा गावात तीव्र शोककळा पसरली असून, परिजनोंच्या आक्रोशाने उपस्थितांचेही मन हेलावले.
नागरिकांमध्ये दहशत; वनविभागाचे सुरक्षेचे आवाहन
मागील काही दिवसांपासून या परिसरात सातत्याने वाघाचा वावर व संचलन वाढल्याचे बोलले जात आहे. नागरिकांच्या जिवाशी खेळणाऱ्या या वन्यप्राण्याचा बंदोबस्त करावा, अशी मागणी संतप्त ग्रामस्थांकडून होत आहे. दरम्यान, वन विभाग व पोलिसांच्या वतीने नागरिकांना सुरक्षेच्या दृष्टीने विशेष खबरदारी बाळगण्याचे आणि शक्यतो जंगल परिसरात एकटे न जाण्याचे आवाहन करण्यात आले आहे.