‘मध्य प्रदेशात सरकार अस्तित्वात आहे की नाही, अशी स्थिती’; खा. राहुल गांधींचा भाजपवर जोरदार हल्लाबोल

कुपोषण, आरोग्य व बेरोजगारीवरून मध्य प्रदेश सरकारवर तोफ : आदिवासी देशाचे मूळ मालक, त्यांना सन्मान मिळालाच पाहिजे
बालाघाट/गोंदिया : “मध्य प्रदेशातील बालाघाट जिल्ह्याची सद्यस्थिती अत्यंत विदारक झाली असून, देशाच्या मध्यभागी सरकार नावाची कोणतीही यंत्रणा शिल्लक आहे की नाही, असा प्रश्न निर्माण झाला आहे. येथील जनता कुपोषण, कोलमडलेली आरोग्य सेवा आणि बेरोजगारीच्या गर्तेत होरपळत आहे,” अशा शब्दांत लोकसभेतील विरोधी पक्षनेते खासदार राहुल गांधी यांनी मध्य प्रदेशातील भाजप सरकारवर घणाघाती हल्ला चढवला. बालाघाट दौऱ्यावर आलेल्या राहुल गांधी यांनी स्थानिक परिस्थितीचा प्रत्यक्ष आढावा घेत भाजपच्या कारभारावर तीव्र ताशेरे ओढले.
कुपोषणामुळे बालकांचे मृत्यू, सरकार ढिम्म!
परिसरातील विदारक स्थिती मांडताना राहुल गांधी म्हणाले की, “या भागात कुपोषण आणि विविध आजारांमुळे अनेक निष्पाप बालकांना प्राण गमवावे लागले आहेत. अनेक माता-पित्यांनी आपली चिमुकली गमावली आहेत; मात्र मध्य प्रदेश सरकारकडून बाधित कुटुंबांना कोणतीही ठोस मदत मिळालेली नाही. निम्headयाहून अधिक पीडित कुटुंबांना अद्याप नुकसानभरपाईसुद्धा देण्यात आलेली नाही, ही अत्यंत संतापजनक बाब आहे.”
जमीन व मनरेगा योजनांमधील गैरव्यवहारांवर बोट
स्थानिक समस्यांकडे लक्ष वेधताना त्यांनी सांगितले की, बालाघाट भागात जमिनींशी संबंधित वाद, वनहक्क कायद्याची पायमल्ली आणि मनरेगा (रोजगार हमी योजना) मधील अनागोंदी शिगेला पोहोचली आहे. “राज्यात जर दोन शासकीय योजना सुरू असतील, तर नागरिकांना दोन्ही योजनांचा लाभ मिळायला हवा. परंतु, प्रत्यक्षात एका योजनेचा लाभ देऊन दुसऱ्या योजनेतून लोकांची नावे परस्पर वगळली जात आहेत,” असा गंभीर आरोप त्यांनी केला.
“भाजप २४ तास विकासाच्या गप्पा मारते, मात्र जबाबदारीच्या वेळी गायब”
भाजपच्या कार्यपद्धतीवर जोरदार टीका करताना राहुल गांधी म्हणाले, “२४ तास विकासाच्या मोठ्या वल्गना करणारे राज्यकर्ते प्रत्यक्ष जबाबदारी पार पाडण्याची वेळ येते तेव्हा पूर्णपणे गायब होतात. हे मध्य प्रदेश सरकारचे १०० टक्के ‘सिस्टम फेल्युअर’ (प्रशासकीय अपयश) आहे. बालाघाटच्या सर्वसामान्य नागरिकांना उत्तम शाळा, दर्जेदार रुग्णालये आणि त्यांचे घटनात्मक अधिकार मिळालेच पाहिजेत.”
“ते वनवासी नव्हे, तर देशाचे पहिले मालक ‘आदिवासी’!”
आदिवासी समाजाच्या सन्मानाचा मुद्दा उपस्थित करत राहुल गांधी म्हणाले, “भाजप त्यांना ‘वनवासी’ म्हणते, पण आम्ही त्यांना अभिमानाने ‘आदिवासी’ मानतो. आदिवासी बांधव हे या देशाचे मूळ व पहिले मालक आहेत. त्यामुळे देशाच्या साधनसंपत्तीवर आणि व्यवस्थेत त्यांना पूर्ण सन्मान, हक्काची जागा व सर्व सोयीसुविधा प्राधान्याने मिळायला हव्यात.” या भागातील दुरावस्था पाहून मन व्यथित झाले असून, काँग्रेसचे सरकार येताच या सर्व समस्या प्राधान्याने सोडवल्या जातील, असा विश्वास त्यांनी जनतेला दिला.