दर्शनासाठी येणाऱ्या भाविकांना २ लाखांचे मोफत अपघात विमा संरक्षण!

दुर्गा चौक गणेश मंडळाचा कौतुकास्पद उपक्रम
अर्जुनी-मोरगाव (गोंदिया): गणेशोत्सव म्हणजे भक्ती, उत्साह आणि सामाजिक एकोप्याचा सण. याच भावनेला सामाजिक बांधिलकीची जोड देत अर्जुनी-मोर येथील प्रसिद्ध दुर्गा चौक गणेश मंडळाच्या वतीने यंदा भाविकांसाठी एक अत्यंत अभिनव व स्तुत्य उपक्रम राबवण्यात येत आहे. मंडळाच्या श्रींच्या दर्शनासाठी येणाऱ्या प्रत्येक भाविकाला तब्बल २ लाख रुपयांचे मोफत अपघात विमा संरक्षण देण्याचा महत्त्वपूर्ण निर्णय मंडळाने घेतला आहे.
गणेशोत्सवाच्या काळात बाप्पाच्या आगमनापासून ते विसर्जनापर्यंतच्या संपूर्ण कालावधीत मंडळात दर्शनासाठी येणाऱ्या भाविकांना हे विमा संरक्षण उपलब्ध राहणार आहे. उत्सवाच्या आनंदासोबतच भाविकांच्या सुरक्षिततेला प्राधान्य देण्याचा एक अनोखा संदेश या उपक्रमातून देण्यात आला आहे.

‘एसबीआय’ किंवा ‘बँक ऑफ बडोदा’मध्ये खाते असणे अनिवार्य!
मंडळाने दिलेल्या माहितीनुसार, या मोफत अपघात विमा योजनेचा लाभ घेण्यासाठी संबंधित भाविकाचे स्टेट बँक ऑफ इंडिया (SBI) किंवा बँक ऑफ बडोदा यांपैकी कोणत्याही एका बँकेत खाते असणे आवश्यक आहे.
विमा संरक्षणाचा हा लाभ संबंधित विमा योजनेच्या नियम, अटी व पात्रतेनुसार दिला जाईल, असेही मंडळाच्या पदाधिकाऱ्यांनी स्पष्ट केले आहे.
भक्ती अन् सामाजिक सुरक्षिततेचा अनोखा मेळ
गणेशोत्सव हा केवळ धार्मिक सोहळा न राहता तो समाजोपयोगी उपक्रमांचा मंच व्हावा, या उद्देशाने दुर्गा चौक गणेश मंडळ दरवर्षी विविध सामाजिक उपक्रम राबवत असते. यंदाचे २ लाख रुपयांचे मोफत अपघात विमा संरक्षण भाविकांच्या दृष्टीने अत्यंत दिलासादायक ठरणार आहे. मंडळाच्या या उपक्रमाचे परिसरातील नागरिक व भाविकांकडून जोरदार स्वागत होत असून, गणेशोत्सवाच्या माध्यमातून समाजोपयोगी कार्याची परंपरा अधिक व्यापक करण्याचा हा प्रयत्न इतर मंडळांसाठीही आदर्श ठरत आहे.