डवकी नाल्यावरील लाखो रुपयांचा ‘कोल्हापुरी बंधारा’ ठरतोय केवळ शोभेची वास्तू

अधिकाऱ्यांच्या संगनमताने कंत्राटदाराची मनमानी; परवाना रद्द करून उच्चस्तरीय चौकशीची शेतकऱ्यांची संतप्त मागणी
देवरी (प्रतिनिधी): जनतेच्या घामाचा पैसा आणि शासनाचा लाखो रुपयांचा निधी अक्षरशः कसा ‘पाण्यात’ जातो, याचा संतापजनक आणि विदारक नमुना देवरी जवळील डवकी नाल्यावर उघडकीस आला आहे. शेतकऱ्यांच्या शेतीला आणि जनावरांना ऐन उन्हाळ्यात पाणी मिळावे, या उदात्त हेतूने अवघ्या वर्षभरापूर्वी बांधण्यात आलेला कोल्हापुरी बंधारा आज पूर्णपणे कोरडाठाक पडला आहे. प्रशासनाचा भोंगळ कारभार आणि कंत्राटदाराच्या निकृष्ट कामामुळे ही वास्तू केवळ एक ‘शोभेचे बाहुले’ बनून राहिली असून, संतप्त शेतकऱ्यांनी या भ्रष्ट साखळीवर कडा प्रहार करत कंत्राटदाराचा परवाना तात्काळ रद्द करण्याची मागणी केली आहे.
वर्षभरापूर्वी मोठा गाजावाजा करत डवकी नाल्यावर या कोल्हापुरी बंधाऱ्याचे बांधकाम करण्यात आले होते. यासाठी शासनाच्या तिजोरीतून लाखो रुपयांचा निधी खर्च करण्यात आला. मात्र, कामाचा दर्जा इतका सुमार आणि निकृष्ट होता की, पहिल्याच उन्हाळ्यात या बंधाऱ्याची पोलखोल झाली आहे. आजघडीला या बंधाऱ्यात पाण्याचा एक थेंबही शिल्लक नाही. पाणी अडवण्याचे मूळ उद्दिष्टच हवेत विरल्याने, परिसरातील शेतकरी आणि मुक्या जनावरांचे पाण्यावाचून अतोनात हाल होत आहेत. विकासकामांच्या नावाखाली केवळ स्वतःचे खिसे भरण्याचे काम प्रशासनातील काही अधिकाऱ्यांनी आणि कंत्राटदारांनी केले असल्याचे आता स्पष्ट झाले आहे.
पाणीटंचाईच्या या भीषण झळा सोसत असतानाच, डोळ्यांदेखत लाखो रुपयांचा भ्रष्टाचार पाहिल्याने शेतकऱ्यांचा संयम आता सुटला आहे. त्यांनी प्रशासनाकडे खालील मागण्या करत एल्गार पुकारला आहे:
उच्चस्तरीय चौकशी व्हावी: या निकृष्ट कामाची केवळ कागदोपत्री मलमपट्टी न करता, सखोल आणि तटस्थ समितीमार्फत उच्चस्तरीय चौकशी करण्यात यावी.
कंत्राटदाराचा परवाना रद्द करा: कर्तव्यात कसूर करणाऱ्या आणि दर्जाहीन बांधकाम करणाऱ्या कंत्राटदाराला काळया यादीत (Blacklist) टाकून त्याचा परवाना तात्काळ रद्द करण्यात यावा.
दोषींवर गुन्हे दाखल करा: जनतेच्या पैशांचा अपव्यय करणाऱ्या संबंधित दोषी अधिकाऱ्यांवर आणि कंत्राटदारावर कठोर कायदेशीर कारवाई करून गुन्हे दाखल करावेत. एकीकडे शेतकरी पाण्यासाठी वणवण भटकत आहे, तर दुसरीकडे भ्रष्टाचाराच्या वाळवीने पोखरलेले हे बंधारे उघडे पडत आहेत. आतातरी या कुंभकर्णी झोपेत असलेल्या प्रशासनाला जाग येणार का? की नेहमीप्रमाणे ‘तेरी भी चूप, मेरी भी चूप’ म्हणत या प्रकरणावरही पांघरूण घातले जाणार? याकडे संपूर्ण देवरी परिसराचे आणि शेतकरी बांधवांचे लक्ष लागून आहे. प्रशासनाने तातडीने पावले न उचलल्यास तीव्र आंदोलनाचा इशाराही शेतकऱ्यांनी दिला आहे.
……………………………………………
माहिती फलक गायब; काळंबेरं लपवण्याचा डाव?
कोणत्याही शासकीय कामाच्या ठिकाणी प्रकल्पाचे नाव, एकूण खर्च, कंत्राटदाराचे नाव आणि कामाचा कालावधी दर्शवणारा माहिती फलक (Information Board) लावणे कायद्याने बंधनकारक आहे. मात्र, डवकी नाल्यावरील या बंधाऱ्याच्या ठिकाणी असा कोणताही फलक अस्तित्वात नाही. माहिती लपवण्याचा हा प्रकार म्हणजे कंत्राटदार आणि भ्रष्ट अधिकाऱ्यांच्या संगनमताने रचलेला मोठा डाव असल्याचा दाट संशय आता नागरिकांमधून व्यक्त केला जात आहे. “आमच्या घामाच्या पैशांची या भ्रष्ट व्यवस्थेला कवडीचीही किंमत राहिलेली नाही,” अशी संतप्त प्रतिक्रिया स्थानिक शेतकरी व्यक्त करत आहेत.