Mla Rajkumar Badole: शिक्षण सेवक पद रद्द करण्यासाठी प्रयत्न करणार

प्राथमिक शिक्षक संघाच्या वतीने भव्य सत्कार व शिक्षक मेळावा संपन्न

अर्जुनी/मोरगाव : शिक्षकांचा सत्कार म्हणजे ज्ञानदेवतेचा गौरव आहे. शिक्षक पात्रता परीक्षेबाबत शासनापर्यंत शिक्षकांची बाजू मांडणार असून, शिक्षण सेवक पद रद्द करण्यासाठी लक्षवेधी प्रयत्न केले जातील. असे आमदार राजकुमार बडोले (Mla Rajkumar Badole) यांनी म्हटले.महाराष्ट्र राज्य प्राथमिक शिक्षक संघ, अर्जुनी मोरगाव शाखेच्या वतीने शिक्षक दिनाचे औचित्य साधून भव्य शिक्षक सत्कार व शिक्षक मेळावा साई श्रद्धा लॉन येथे उत्साहात पार पडला.कार्यक्रमाचे उद्घाटन माजी मंत्री व आमदार राजकुमार बडोले (Mla Rajkumar Badole) यांच्या हस्ते झाले. अध्यक्षस्थान गोंदिया जिल्हा परिषद अध्यक्ष लायकराम भेंडारकर यांनी भूषविले. दीपप्रज्वलनाचा मान पंचायत समिती सभापती आम्रपाली डोंगरवार यांना लाभला. या सोहळ्यात नवनियुक्त शिक्षक, उच्च श्रेणी मुख्याध्यापक, सेवानिवृत्त शिक्षक तसेच दिव्यांग कल्याण विभागातून नियमित सेवेत आलेल्या शिक्षकांचा मान्यवरांच्या हस्ते सत्कार करण्यात आला. सुमारे 130 सत्कारमूर्तींना भेट स्वरूपात संविधान पुस्तक देण्यात आले, हे या कार्यक्रमाचे विशेष आकर्षण ठरले.

अध्यक्ष स्थानावरून बोलताना जि.प. अध्यक्ष लायकराम भेंडारकर यांनी शिक्षकांच्या कामगिरीचे कौतुक केले. “जिल्हा परिषदेच्या माध्यमातून शिक्षक व शिक्षणासाठी सकारात्मक पावले उचलली जात आहेत. शिक्षकांच्या समस्या सोडवण्यात आनंद वाटतो,” असे त्यांनी नमूद केले.

कार्यक्रमात जि.प. सदस्या जयश्री देशमुख, रचना गहाणे, पं.स. उपसभापती संदीप कापगते, जि.प. शिक्षक संघ जिल्हाध्यक्ष किशोर बावनकर, शासकीय कर्मचारी पतसंस्थेचे उपाध्यक्ष शंकर चव्हाण यांच्यासह अनेक मान्यवरांची उपस्थिती होती. प्रास्ताविक तालुका अध्यक्ष कैलास हांडगे यांनी केले, आभार तालुका सचिव किशोर लंजे यांनी मानले. संचालन रमेश संग्रामे, भुवन औरासे, चंद्रशेखर गभने व प्रशांत चव्हाण यांनी केले.