गणेश विसर्जनादरम्यान तिघांचा बुडून मृत्यू, एकाचा शोध सुरूच

बगाजी सागरमध्ये बुडाला करण, आदेशचा मृतदेह कोदोरी शिवारात

धामणगाव रेल्वे  : जिल्ह्यात गणेश विसर्जनादरम्यान तिघांचा पाण्यात बुडून मृत्यू झाला. धामणगाव रेल्वे तालुक्यातील बगाजी सागर धरण (bagaji sagar dam) व चांदूर बाजार तालुक्यातील देऊरवाडा येथील पूर्णा नदीच्या (purna river) पात्रात दोन तरुण बुडाले. दर्यापुरातील चंद्रभागा नदीत बुडून महिलेचा मृत्यू झाला.
करण अमोल चव्हाण (२०, रा. वाघोली) या युवकाचा अंघोळ करताना बगाजी सागर धरणात बुडून मृत्यू झाला. चव्हाण कुटुंबीय व काही मित्र चारचाकी परिसरातील कावसर्जनासाठी बगाजी सागर धरणावर (bagaji sagar dam) गेले होते. शनिवारी दुपारी करणसह अथर्व इंगोले (१६) व पृथ्वी चव्हाण (१९) हे देखील पाण्यात उतरले होते. पण, त्यांनी आरडाओरड केल्याने लोकांनी अथर्व व पृथ्वीचे प्राण वाचविले, तर तासाभरानंतरही काही अंतरावर करणचा मृतदेह आढळला. त्याच्या पश्चात आई-वडील व धाकटा भाऊ आहे. वडिलांचा दुग्धव्यवसाय व शेती तो सांभाळत होता.
चांदूर बाजार तालुक्यातील देऊरवाडा येथील युवक पूर्णा नदीपात्रात वाहून गेला होता. त्याचा मृतदेह अखेर आढळला. आदेश गंगाधर पंधरे (२७) असे मृताचे नाव आहे. शनिवारी सायंकाळी ६ वाजता तो मित्रांसोबत गणेश विसर्जनासाठी नदीपात्रात शिरला होता. पूर्णा नदीपात्रात विश्रोळी येथील पूर्णा प्रकल्पाचे पाणी सोडण्यात आल्याने नदीचा प्रवाह वेगवान झाला आहे. मित्र  नदीपात्राबाहेर आले तेव्हा आदेश सोबत नव्हता. याबाबत तत्काळ महसूल प्रशासनाला व पोलिस विभागाला माहिती देण्यात आली. बचाव पथकाने रात्रभर शोधमोहीम राबविली. ७ सप्टेंबरला सकाळी १० वाजता कोदोरी शिवारातील नदीपात्रात आदेशचा मृतदेह आढळून आला. शिरजगाव कसबा पोलिसांनी पंचनामा करून तो मृतदेह चांदूर बाजार उपजिल्हा रुग्णालयात पाठविला. दर्यापूर शहरात गणेश विसर्जनाला गेलेल्या महिलेचा शनिवारी दुपारी ४ च्या सुमारास चंद्रभागा नदीत पाय घसरल्याने बुडून मृत्यू झाला. मुक्ता साहेबराव श्रीनाथ (३२, रा. बनोसा, दर्यापूर) असे मृताचे नाव आहे. तुडुंब नदीतून बऱ्याच प्रयत्नानंतर नागरिकांनी तिला बाहेर काढले. दर्यापूर उपजिल्हा रुग्णालयात दाखल केल्यावर डॉक्टरांनी तिला मृत घोषित केले. दर्यापूर ठाण्यात अकस्मात मृत्यूची नोंद करण्यात आली आहे.

……………..

गडगा नदीत वाहून गेला युवक
धारणी : तालुक्यातील धुळघाट गडगा येथील गडगा नदीपात्रात ६ सप्टेंबरला सायंकाळी कुसुमकोट बुजुर्ग येथील अनिल गणेश माकोडे (३०) हा वाहत गेला. त्याचा अद्याप मृतदेह हाती लागलेला नाही. गणेश विसर्जनासाठी नदीवर गेलेला अनिल मित्रांसोबत पात्रात उतरल्यानंतर अचानक त्याचा तोल गेला आणि तीव्र धारेमध्ये तो वाहून गेला. मित्रांचा त्याला वाचविण्याचा खटाटोप व्यर्थ गेला. शनिवारी रात्रभर त्याचा नदीपात्रात शोध घेण्यात आला. त्यात यश न आल्यामुळे रविवारी बचाव पथकाला पाचारण करण्यात आले. या पथकाने सकाळी ११ पासून शोध सुरू केला आहे. धारणी पोलिस ठाण्याच्या हद्दीपर्यंत त्याचा शोध लागला नसल्याने लगतच्या तापी नदीपात्रात शोध घेतला जाणार असल्याचे ठाणेदार अवतारसिंह चव्हाण यांनी स्पष्ट केले. ग्रामस्थदेखील सहकार्य करीत आहेत