Khanij utkhanan  : रस्त्यावर पडलेल्या त्या मुरूमाची जोरदार चर्चा

अवैध गौण खनिज उत्खनन ? : महसूल विभागाच्या आशीर्वाद
अर्जुनी मोरगाव : तालुक्यातील ईळदा परिसरात अवैधरित्या गौण खनिज उत्खनन (Khanij utkhanan)  करून सर्रासपणे शासन व प्रशासनाच्या डोळ्यात धूळफेक केली जात आहे. कंत्राटदाराकडून कसलीही परवानगी न घेता मुरूमाचे उत्खनन केले जात आहे. शिवाय रस्ता कामात उपयोग देखील करवून घेतला जात आहे. या प्रकाराने शासनाच्या महसूलाला चुना लावला जात आहे. तर उत्खनन होत असल्याने टेकड्यांचे अस्तित्व धोक्यात येवू लागले आहेत. यामुळे पर्यावरणावर याचा परिणाम होत आहे. ईळदा जांभळी मार्गावर कंत्राटदाराकडून रस्त्याच्या कडेला मुरूमाचे ढिगारे टाकण्यात आले आहेत. त्यामुळे त्या मुरूमाची जोरदार चर्चा परिसरात रंगली असून अवैध गौण उत्खननाचा (Khanij utkhanan) प्रश्न ऐरणीवर आला आहे.
ईळदा परिसरात शासनाच्या धोरणानुसार राजोली आणि ईळदा अशी दोन नवीन तलाठी कार्यालये स्थापन करण्यात आली आहेत. मात्र नव्याने स्थापन झालेले दोन्ही तलाठी कार्यालय मागील कित्येक वर्षापासून नागरिकांच्या सेवेत नसल्याने सध्या राजोली साझ्याचा कारभार भरनोली तर ईळदा परिसरातील गावाचा कारभार परसटोला साझ्यातुन आहे. परिसर मोठा आणि जंगलव्याप्त आहेच शिवाय नक्षल प्रभावित म्हणून शासन दरबारी नुकतेच गणल्या गेले आहे. त्यामुळे प्रशासकीय अधिकार्‍यांचा वचक सायंकाळी सहानंतर अवैध धंदेखोरांवर राहिलेला दिसून येत नाही. अशातच मागील जुलै महिन्यात ईळदा जांभळी मार्गावर कंत्राटदाराकडून सिमेंट काँक्रिट रस्त्याचे अंदाजे शंभर मीटर बांधकाम करण्यात आले आहे. माञ त्या रस्त्यामध्ये किती दर्जेदारपणा आहे हे सबंधित यंत्रणेच्या तपासाअंती दिसून येईल. आजघडीला रस्त्याचे बांधकाम पूर्ण झाल्याचे निदर्शनात येत आहे. अतिमागास आणि नक्षल प्रभावित गावांचा सर्वागीण विकास करण्यासाठी शासन स्तरावरून भरीव निधीची तरतूद करण्यात येते. त्यात ग्रामीण भागातील रस्तेविकास हा महत्वाचा भाग समजल्या जातो. मात्र याच ग्रामीण भागात अप्रशीक्षित कंत्राटदार बहुतांशी रस्त्याचे काम करतांना दिसतात. सदर बांधकामात दर्जाहीन साहित्याचा पुरवठा केला जातो. पुरविलेल्या बांधकाम साहित्याची तपासणी सबंधित यंत्रणेकडून केली जात नाही. परिणामी केलेले बांधकाम एक वर्षात तर कुठे सहा महिन्यांत उखळतात. याची कधी साधी चौकशी केल्या जात नाही. कधी डागडुजी होते परंतु ती थातुरमातुरच असते. संपूर्ण काम संपून जाते मात्र बांधकामाचा सबंधित तांत्रिक अधिकारी कधी भेट देत नाही. अशी वास्तव स्थिती ईळदा परिसरातील नागरिकांना चांगलीच अवगत आहे.