star international school : स्टार इंटरनॅशनल शाळेत ‘स्पेस डे’

गोंदिया : स्टार इंटरनॅशनल शाळेत स्पेस डे (अंतराळ दिवस) मोठ्या उत्साहात साजरा करण्यात आला. कार्यक्रमाचे प्रमुख पाहुणे शिक्षण अधिकारी विशाल डोंगरे होते. त्यांच्या हस्ते दीपप्रज्वलन करून या कार्यक्रमाचे शुभारंभ करण्यात आला. कार्यक्रमात गोंदिया जिल्ह्यातील २० पेक्षा अधिक शाळांनी सहभाग घेतला होता. विविध शाळांमधील विद्यार्थ्यांसाठी विज्ञान व अंतराळाशी निगडित वेगवेगळ्या प्रकारच्या स्पर्धा आयोजित करण्यात आल्या. (पोस्टर मेकिंग , रांगोळी स्पर्धा , निबंध स्पर्धा, मॉडेल मेकिंग स्पर्धा) या स्पर्धांमध्ये अनेक विद्यार्थ्यांनी उत्साहाने भाग घेतला.
मुख्य पाहुणे डोंगरे यांनी विद्यार्थ्यांना अंतराळ दिवस का साजरा केला जातो ? कोण साजरा करतो ? आणि या दिवसाचे महत्त्व याबाबत सविस्तर माहिती दिली. तसेच भारताच्या अंतराळ संशोधन क्षेत्रातील कार्य, उपलब्धी व करिअरच्या संधींबाबत विद्यार्थ्यांना मार्गदर्शन केले. स्पर्धेत विजयी ठरलेल्या विद्यार्थ्यांचा पारितोषिक देऊन गौरव करण्यात आला. यशस्वी विद्यार्थ्यांची विदर्भ स्तरावरील स्पर्धेसाठी निवड करण्यात आली .
कार्यक्रमाच्या विशेष पाहुण्या म्हणून शिक्षण विस्तार अधिकारी सौ. पौर्णिमा विश्वकर्मा उपस्थित होत्या. त्यांच्या हस्ते विद्यार्थ्यांना पारितोषिक प्रदान करण्यात आले.
शाळेच्या मुख्याध्यापिका सौ. रत्ना खन्ना मॅडम यांनी विद्यार्थ्यांचे मनापासून कौतुक करताना सांगितले की, विज्ञानाविषयीची आवड आणि अंतराळ क्षेत्रातील करिअर घडविण्याची प्रेरणा विद्यार्थ्यांना अशा उपक्रमांतून मिळते.
शाळेचे संचालक निखिल जैन यांनीही विद्यार्थ्यांचे कौतुक करत विज्ञान व तंत्रज्ञानाकडे नवीन पिढीला आकर्षित करण्याची गरज अधोरेखित केली. विद्यार्थ्यांनी घेतलेल्या जोशपूर्ण सहभागामुळे कार्यक्रम अत्यंत यशस्वी झाला. भारताच्या अंतराळ कार्यक्रमाचा अभिमान व्यक्त करत आणि विद्यार्थ्यांना अंतराळ संशोधन क्षेत्रात पुढे जाण्याची प्रेरणा देत या कार्यक्रमाचा समारोप करण्यात आला.