मुख्यमंत्री सहाय्यता निधी व धर्मदाय रुग्णालय मदत कक्ष,  जिल्हा कक्ष भंडारा मार्फत रुग्णाला साडेचार लाखांची मदत

भंडारा : भंडारा जिल्ह्यातील परसोडी जवाहर नगर येथील रुपम संजय हटवार (वय १४ वर्षे) या रुग्णास लीव्हर ट्रान्सप्लांट शस्त्रक्रियेसाठी मुख्यमंत्री सहाय्यता निधी व धर्मदाय रुग्णालय मदत कक्ष, जिल्हाधिकारी कार्यालय, भंडारा यांच्या माध्यमातून एकूण ४ लाख ५० हजार रुपयांची आर्थिक मदत करण्यात आली आहे.
रुग्णाचे वडील संजय हटवार हे १९ जून २०२५ रोजी जिल्हाधिकारी कार्यालयातील मदत कक्षात आले होते. त्यांनी सांगितले की, रुपमचा उपचार न्यू इरा हॉस्पिटल, नागपूर येथे सुरू असून, लीव्हर ट्रान्सप्लांटसाठी सुमारे २० लाख रुपयांची आवश्यकता आहे. त्यानंतर कक्षामार्फत आवश्यक कागदपत्रांची पूर्तता करून संबंधित प्रस्ताव सचिवालय, नागपूर येथे पाठवण्यात आला.
रुपम हटवार यांची लीव्हर ट्रान्सप्लांट शस्त्रक्रिया यशस्वीरित्या पूर्ण झाली असून, दहा दिवसांच्या उपचारानंतर त्याला रुग्णालयातून डिस्चार्ज देण्यात आला आहे. या प्रकरणी जिल्हाधिकारी, भंडारा यांनी सनफ्लॅग स्टील कंपनी, भंडारा येथील मा. श्रीवास्तव सर यांच्याशी संपर्क साधून सीएसआर फंडाच्या माध्यमातून मदत करण्याची विनंती केली. त्या अनुषंगाने, कंपनीतर्फे अडीच लाख रुपये मदत जाहीर करण्यात आली. त्यानुसार, मुख्यमंत्री सहाय्यता निधीतून २ लाख रुपये व सीएसआर फंडातून अडीच लाख रुपये, अशी एकूण ₹४.५ लाखांची मदत रुग्णास उपचारासाठी करण्यात आली आहे. रुग्णाच्या कुटुंबीयांनी जिल्हाधिकारी कार्यालयातील मुख्यमंत्री सहाय्यता निधी व धर्मदाय रुग्णालय मदत कक्षाला भेट देऊन आपला मनःपूर्वक आभार व्यक्त केला असून, मा. मुख्यमंत्री यांच्यासह जिल्हा प्रशासनाचे विशेष कौतुक केले आहे.