‘सरावन महिन्यात’ कवितेचे कवी लोकराम शेंडे यांची जांभळी जिल्हा परिषद प्राथमिक शाळेला सदिच्छा भेट

विद्यार्थ्यांशी साधला मनमोकळा संवाद; वाचन, निसर्ग निरीक्षण आणि लेखन कौशल्याचे दिले बहुमोल धडे
गोंदिया : आपल्या पाठ्यपुस्तकात वाचलेली आणि गोड आवाजात गायलेली कविता ज्या कवीने रचली, तो कवी साक्षात समोर येऊन उभा राहिला तर? असाच एक अविस्मरणीय आणि स्वप्नवत अनुभव जांभळी येथील जिल्हा परिषद प्राथमिक शाळेतील चिमुकल्या विद्यार्थ्यांना आला. इयत्ता चौथीच्या मराठी पाठ्यपुस्तकातील अत्यंत लोकप्रिय ठरलेल्या ‘सरावन महिन्यात’ या कवितेचे कवी श्री. लोकराम शेंडे यांनी शाळेला सदिच्छा भेट दिली. आपल्या आवडत्या कवितेच्या कवीला प्रत्यक्ष भेटण्याची सुवर्णसंधी मिळाल्याने विद्यार्थ्यांमध्ये कमालीचा उत्साह आणि आनंदाचे वातावरण पाहायला मिळाले.
या साहित्यिक स्नेहभेटीप्रसंगी शाळेच्या वतीने कवी लोकराम शेंडे यांचा शाल व स्मृतिचिन्ह देऊन यथोचित आणि भावपूर्ण सत्कार करण्यात आला. या वेळी शाळेचे मुख्याध्यापक किशोर डोंगरवार, शिक्षक सचिन मोहुर्ले आणि राजेश सोनवाने यांच्यासह सर्व शिक्षकवृंद व विद्यार्थी मोठ्या संख्येने उपस्थित होते.
सत्काराला मनोगतातून उत्तर देताना कवी लोकराम शेंडे यांनी विद्यार्थ्यांशी अत्यंत आपुलकीने आणि सहजतेने संवाद साधला. “कविता कशी सुचते, तिच्या निर्मितीमागे कोणते भावविश्व दडलेले असते, साहित्य निर्मितीसाठी निसर्गाचे सूक्ष्म निरीक्षण किती गरजेचे आहे आणि नियमित वाचनाची सवय सर्जनशीलतेला कशी नवी दिशा देते,” याविषयी त्यांनी विद्यार्थ्यांना रंजक शैलीत मार्गदर्शन केले.या आगळ्यावेगळ्या आणि प्रेरणादायी कार्यक्रमाच्या यशस्वीतेसाठी शाळेतील शिक्षक धम्मदीप साखरे, भुवन बागडे, जितेंद्र कवरे, श्यामा कुंडगीर, माया तांदळे यांच्यासह विद्यार्थ्यांनी विशेष सहकार्य केले. शाळेच्या वतीने कवी शेंडे यांचे आभार मानण्यात आले.
विद्यार्थ्यांच्या प्रश्नांना कवींची उत्स्फूर्त उत्तरे!
विद्यार्थ्यांनीही या वेळी मोठ्या कुतूहलाने कवी शेंडे यांना कविता लेखन, साहित्यनिर्मिती, निसर्गाशी नाते आणि त्यांच्या संपूर्ण लेखनप्रवासाबद्दल अनेक प्रश्न विचारले. कवी महोदयांनीही प्रत्येक बालसुलभ प्रश्नाला हसतमुखाने व उत्स्फूर्त उत्तरे देऊन विद्यार्थ्यांचे समाधान केले. केवळ पुस्तकात कविता वाचण्यापुरते मर्यादित न राहता, प्रत्यक्ष कवीशी संवाद साधण्याचा हा अनोखा अनुभव विद्यार्थ्यांच्या मनावर कायमचा कोरला गेला आहे. या उपक्रमामुळे शालेय विद्यार्थ्यांमध्ये वाचन आणि लेखनाची नवी आवड निर्माण झाली आहे.
प्रतिक्रिया:
“आपल्या शाळेतील विद्यार्थ्यांना पाठ्यपुस्तकातील कवितेच्या कवीशी थेट संवाद साधता आला, ही आमच्या संपूर्ण शाळेसाठी अभिमानाची बाब आहे. अशा साहित्यिक भेटींमुळे विद्यार्थ्यांमध्ये सर्जनशीलता वाढीस लागते. कवी लोकराम शेंडे यांनी बहुमूल्य वेळ दिल्याबद्दल आम्ही त्यांचे ऋणी आहोत.”
— किशोर डोंगरवार (मुख्याध्यापक, जि. प. शाळा जांभळी)
“पाठ्यपुस्तकातील माझी कविता अभ्यासणाऱ्या बालमित्रांना प्रत्यक्ष भेटताना मला मनस्वी आनंद झाला. मुलांच्या डोळ्यांतील चमक आणि साहित्याबद्दलचे प्रेम प्रेरणादायी आहे. विद्यार्थ्यांनी नियमित वाचन करावे आणि आपल्या कल्पकतेला शब्दांत मांडण्याचा प्रयत्न करावा.”
— लोकराम शेंडे (प्रसिद्ध कवी)