अक्रोशित गावकर्‍यांचा आमदार निवासावर हल्लाबोल
समस्यांना घेवून चुंभलीवासीयांचा संताप
आमदार दुर्लक्ष करीत असल्याचा आरोप
गोंदिया : देवरी तालुक्यातील चुंभली गाव विकासाच्या प्रतिक्षेत आहे. देशाला स्वातंत्र मिळून बराच कालावधी लोटला पण चुंभली वासीयांचा विकासाला घेवून सुरू असलेला वनवास काही संपताना दिसून येत नाही. वारंवार क्षेत्रातील आमदार, जनप्रतिनिधी, अधिकारी यांच्या निवेदन देवून विनवनी करण्यात आली. परंतु, सातत्याने दुर्लक्ष करणे सुरू राहिले. अखेर गावकर्‍यांचा संयमाचा बांध लुटला. आणि संतापलेल्या गावकर्‍यांनी ९ ऑक्टोबर रोजी थेट आ.संजय पुराम यांचे निवासस्थानावर हल्ल्लाबोल करीत आक्रोश व्यक्त केला. आमदार होवून आपण दुर्लक्ष करीत आहात, असा आरोप करीत आ.पुराम यांच्या कार्यप्रणालीला घेवून चांगलाच संताप व्यक्त केला. यामुळे काही काळ तणावाचे वातावरण निर्माण झाले होते.
चुंभली-मगरडोह ग्रामपंचायत अंतर्गत येणारा चुंभली गाव विकासाच्या प्रतिक्षेत आहे. देश स्वतंत्र झाला. गाव-पाड्याचा विकास होत गेला. परंतु, चुंभली गाव विकासापासून दूरच राहिला. अतिदुर्गम नक्षलग्रस्त भागातील आदिवासी गाव चुंभली आरोग्य आणि शिक्षणासह अनेक मुलभूत सोयी–सुविधांपासून कोसोदूर आहे. लहानसहान बाबींसाठी चुंभलीवासीयांना आजही संघर्ष करावा लागत आहे. गावाला आजही रस्ता आणि पुलाचे बांधकाम न झाल्याने गावकरी रस्त्यासाठी विनवनी करीत आहेत. परंतु अद्यापही शासन व जनप्रतिनिधींनी या मागणीकडे लक्ष दिले नाही. तर दुसरीकडे रस्ता व पुलाअभावी अनेकांना जीव घेणा प्रवास करून जिवास मुकावे लागले. तर शेतकरी, नागरीक, विद्यार्थी यांना अनेक संकटात दररोज तोंड द्यावे लागत आहे. आपातस्थितीत गरोदर मातांना आरोग्य सुविधांपासून वंचित राहण्याची वेळही अनेकदा ओढावली आहे. जिल्हा प्रशासनाकडून गावाची पाहणी करण्यात आली. सोयी-सुविधांचा अभाव पाहून गेले. गावात ये-जा करण्यासाठी रस्ता, पुलाची किती आवश्यकता आहे, हे अधिकार्‍यांना दिसून आले. परंतु, कागदीघोडे अडले कुठे? देव जाणे. पाहणीनंतरही उपाययोजना शुन्यच राहिल्या. सोयी सुविधा उपलब्ध व्हाव्यात, पुल, रस्ते तयार व्हावे, या मागणीला घेवून कित्येकदा आंदोलन झालीत. निवेदन देण्याचे सत्र सुरूच राहिले. पण आ.संजय पुराम, प्रशासनातील अधिकारी आपल्याच तोर्‍यात राहून गावकर्‍यांच्या संयमाची प्रतिक्षा करीत राहिले. अखेर चुंभलीवासीयांचा संयमाचा बांध तुटला. संतापलेल्या गावकर्‍यांनी समस्यांना घेवून ९ ऑक्टोबर रोजी आ.संजय पुराम यांच्या निवासस्थानी धडक दिली. हल्लाबोल करीत आमदारांना चांगलेच धारेवर धरले. दरम्यान ठिय्या देत आमदाराच्या कार्यप्रणाली व पोकळ आश्वासनावर चांगलाच संताप व्यक्त केला. या आंदोलनात मगरडोह ग्रामपंचायतच्या सरपंच कोरेटी, उपसरपंच तथा माजी सरपंच विलासदादा भोगारे, पालांदूरच्या सरपंच जयवंता हरदुले, नूरचंद नाईक, नूतन पदे, अरुण पदे, तुलसीदास खोब्रागडे, कालिंद्र गुरनुले उपसरपंच पालांदूर, राजकुमार राउत, खुशाल राउत, संतोष कारचाल यांच्यासह मगरडोह, चुंभली, घोगरा, बलापूर, चिलमटोला, पालांदूर, गरारटोला येथील गावकरी सहभागी झाले होते. गावकर्‍यांचा रोष आणि आक्रोश वाढल्याने काही काळ तणावाचे वातावरण निर्माण झाले होते.
…………………………
लवकरच रस्ता बांधकामाला सुरूवात : आ.पुराम
चुंभलीसह सहा गावातील नागरिकांनी आ.पुराम यांच्या निवासस्थानावर हल्लाबोल करीत चांगलाच आक्रोश व्यक्त केला. दरम्यान आ.पुराम यांनी नागरिकांचा रोष शांत करण्याचा प्रयत्नकेला. दिवाळीनंतर प्रत्यक्ष पाहणी करून पुलाच्या व रस्त्याच्या कामाला सुरवात करू, असे आश्वासन दिले.
उपसरपंच भोगारे यांनी वेळोवेळी मांडल्या समस्या
चुंभली येथे रस्ता व पुलाची समस्या गंभीर झाली आहे. याचा फटका परिसरातील पाच ते सहा गावांना सुध्दा बसत आहे. ही समस्या घेवून मगरडोहचे उपसरपंच विलास भोगारे यांनी वेळोवेळी आमदारांसह अधिकार्‍यांना निदर्शनास आणून दिली. मूलभूत सुविधांपासून वंचित राहून गावकरी अनेक संकटाना तोंड देत हाल अपेष्टा सहन करीत राहिले. पण प्रशासन व आमदाराला जाग आली नाही.००००००
