Election news: प्रत्येक प्रभागात ‘वॉच अ‍ॅण्ड वेटिंग; मात्र मोर्चेबांधणी सुरू
पालिकेसाठी नवीन चेहर्‍यांची गर्दी वाढणार
गोंदिया : जिल्ह्यात नागरी संस्थांच्या निवडणुकीची धामधूम सुरू झाली आहे. निवडणूक कार्यक्रम जाहिर होताच इच्छूकांकडून जोरदार तयारी केली जात आहे. काहींनी तिकीटासाठी लॉबिंग करणे सुरू केले आहे. त्यामुळे शहरातील राजकीय वातावरण दिवसेंदिवस तापत असून, मतदारांपासून ते पक्षांपर्यंत सर्वत्र चर्चेचा विषय बनला आहे. यंदाच्या निवडणुकीत अनेक नवीन चेहरे राजकारणात पदार्पण करण्यास सज्ज झाले आहेत. विविध पक्षांकडून इच्छुक उमेदवारांची हालचाल वाढली असून, प्रचाराची प्राथमिक तयारीही सुरू झाली आहे. काही ठिकाणी बैठका, तर काही ठिकाणी जनसंपर्क मोहिमा गती घेत आहेत. अनेक नवीन इच्छूक तिकिटासाठी वाट पाहात आहेत. तिकिट नाही मिळाले तर अपक्ष म्हणून निवडणूक लढवण्याच्या तयारीत आहेत.
Election news जिल्ह्यातील नगर परिषद, नगर पंचायत निवडणुकीचा बार उडाला आहे. गोंदिया, तिरोडा या दोन नगरपरिषद तर गोरेगाव सालेकसा या दोन नगर पंचायतीसाठी निवडणूक होणार आहे. निवडणुकीच्या प्रतिक्षेत असलेले इच्छूक आता पूर्णत: सक्रिय झाले असून आपली बाजू भक्कम करण्यासाठी समीकरण बसविले जात आहेत. नगर परिषद, नगर पंचायतीत निवडणूक दुरंगी, तिरंगी की चौरंगी होणार याबाबत अद्याप स्पष्टता नाही. दररोज संदर्भ बदलत आहेत. मात्र, प्रत्येक पक्षातून इच्छुकांची गर्दी पाहता यावेळी चुरस अधिक वाढण्याची शक्यता नाकारता येत नाही. निवडणुकीचे वातावरण दिवसेंदिवस तापत चालले आहे. Election news राजकीय पक्षांकडून उमेदवारांना घवून चाचपणी करणे सुरू झाले आहे. त्यामुळे निवडणूक रिंगणात तोलामोलाचे उमेदवार उतरविण्याची रणणिती असल्याचे समजून येत आहे. तिकीटासाठी उमेदवार आणि कार्यकत्यांची धावाधाव सुरू झाली असून अघोषित प्रचाराने निवडणुकीचा रंग चांगलाच चढत चालला आहे. माजी नगरसेवक, पराभूत उमेदवारांसह नवीन चेहरेही रिंगणात उतरण्याच्या तयारीत आहेत. यामुळे निवडणुकीची चुरश वाढली असून ऐन वेळेवर तिकीटाला घेवून चांगलीच रस्सीखेच होण्याचे चिन्ह निर्माण होवू लागले आहेत. यामुळे या इच्छूकांना थांबवणे ही त्या त्या पक्षाची, आघाडीसाठी डोकेदुखी ठरणार आहे. मात्र तिकिट मिळाले नाही तर अपक्ष निवडणूक लढवण्याच्या तयारीत अनेक इच्छूक दिसून येत आहेत. त्या दिशेने त्यांचे कामही सुरू आहे. यामुळे मोक्याच्या क्षणी पक्षातील बंडखोरच गणित बिघडविणार, असेही बोलले जात आहे.
————-
सामाजिक कार्यकर्ते उतरणार मैदानात
शहरात अनेक सामाजिक कार्यकर्ते समाजातील विविध घटकांसाठी, विविध प्रसंगी नागरिकांच्या मदतीस धावून जातात. या सामाजिक कार्यकर्त्यांचाही शहरात नागरिकांचे विशेष गट आहेत. त्यामुळे नागरिकांचा कल सामाजिक कार्यकर्त्यांकडे आहे. गेल्या टर्ममध्ये नगरसेवकांच्या कामकाजाबाबतची नाराजी, शहरातील विकासकामांचा झालेला बट्याबोळ यामुळे शहराच्या विकासासाठी झटणारा नगरसेवक असावा, अशी अपेक्षा नागरिकांची असल्याने या सामाजिक कार्यकत्यांनी निवडणूक लढावी अशी अपेक्षा आणि मागणी नागरिकांकडून जोर धरत असल्याने या सामाजिक कार्यकर्ते मैदानात उतरण्याची शक्यता असल्याने इच्छुकांची संख्या वाढणार आहे.
——————
बंडखोरी वाढण्याची शक्यता
प्रभागांमध्ये पडलेल्या आरक्षणानुसार त्या त्या प्रभागातील इच्छुकांची भाऊगर्दी होणार आहे. त्यामुळे पक्षाकडून तिकिट न मिळालेले इच्छुक बंडखोरी करण्याची शक्यता असल्याने बंडखोरांची संख्या वाढणार असून या बंडखोरांना रोखणे हे आव्हान ठरणार आहे. नगरपालिका निवडणूका लवकरच लागणार असल्याने नेत्यांनी कार्यकर्त्यांना तयारीला लागण्याचे आदेश दिले आहेत. नेत्यांच्या बैठका सुरू असून स्वबळावर लढायचे की एकत्रित लढायचे याची खलबते सुरू आहेत. येत्या दोन ते तीन दिवसांत याबाबत स्पष्टता येण्याचे संकेत आहेत.
