जिल्हा परिषद व नगरपरिषदेच्या शाळांचे स्वरूप आणि गुणवत्तेमध्ये आमूलाग्र बदल घडविणार : शालेय शिक्षण मंत्री दादाजी भुसे

शिक्षणाचा दर्जा उंचावण्यासाठी भौतिक सुविधांपासून
भावनिक सहभागापर्यंत व्यापक बदलाचे संकेत
 विद्यार्थ्यांचे कल्याण केंद्रस्थानी “विद्यार्थी हेच आमचे दैवत”
भंडारा : राज्यातील प्राथमिक आणि माध्यमिक शिक्षणाचा दर्जा वाढविण्यासाठी सरकार कटीबद्ध असून, येत्या एक वर्षात जिल्हा परिषद व नगरपरिषदेच्या शाळांचे स्वरूप आणि गुणवत्तेमध्ये आमूलाग्र बदल घडवणार असल्याचा विश्वास राज्याचे  शिक्षण मंत्री दादाजी भुसे यांनी व्यक्त केला. आज बुधवारी भंडारा जिल्ह्याची शैक्षणिक गुणवत्ता आढावा बैठक जिल्हा परिषदेच्या सभागृहात पार पडली, या प्रसंगी ते बोलत होते.
  यावेळी  भंडारा जिल्हा परिषदेच्या अध्यक्षा कविता उईके, मुख्य कार्यकारी अधिकारी मिलिंदकुमार साळवे, शिक्षण उपसंचालक माधुरी सावरकर, जिल्हा परिषदेचे उपाध्यक्ष एकनाथ फेंडर, शिक्षण सभापती नरेश ईश्वरकर, जिल्हा परिषद सदस्य यशवंत सोनकुसरे, शिक्षणाधिकारी (प्राथ.) रवींद्र सोनटक्के, यांचेसह पदाधिकारी व वरिष्ठ अधिकारी उपस्थित होते.

शिक्षणमंत्री दादाजी भूसे म्हणाले, “विद्यार्थी हेच आमचे दैवत आहेत. त्यांच्या कल्याणासाठी भौतिक, बौद्धिक आणि भावनिक अशा सर्व पातळ्यांवर काम करणे आवश्यक आहे,” असे सांगत शिक्षण मंत्र्यांनी जिल्हा परिषद शाळांमधील गरिब व ग्रामीण भागातील विद्यार्थ्यांना स्पर्धात्मक शिक्षण मिळालेच पाहिजे, अशी ठाम भूमिका मांडली. नुकत्याच पार पडलेल्या सिंगापूर अभ्यास दौऱ्याचा उल्लेख करत शिक्षण मंत्र्यांनी तेथील ‘नेशन हब’ भावनेवर आधारित शिक्षणपद्धतीचे उदाहरण दिले. “सिंगापूरमधील शिक्षक हे शिक्षण एक फॅशन म्हणून स्वीकारतात. तशीच दृष्टी आणि जोश महाराष्ट्रातील शिक्षणात आणायचा आहे,” असे त्यांनी सांगितले. शिक्षकांचे प्रश्न हे प्राथमिकतेने सोडविले जातील, यासाठी त्यांनी अधिकाऱ्यांना ऑगस्टपूर्वीच समस्यांचे निराकरण करण्याचे निर्देश दिले. भविष्यात शिक्षकांना विविध कामांसाठी जिल्हा परिषद चकरा माराव्या लागणार नाहीत, यासाठी एक खंबीर कार्यपद्धती तयार केली जाईल, असेही स्पष्ट केले.
 भंडारा जिल्ह्यातील काही जिल्हा परिषद शाळांना अद्याप मान्यता न मिळाल्याबाबत, जिल्हा परिषदेचे मुख्य कार्यकारी अधिकारी यांनी, स्व:ताचे अधिकार वापरून प्रकरण निकाली काढावे, असे स्पष्ट निर्देश त्यांनी दिले. तसेच, शाळांमध्ये शिक्षकांची कमतरता भासू नये म्हणून ‘पवित्र पोर्टलद्वारे भरती प्रक्रियेचे काम सुरू असल्याची माहितीही त्यांनी दिली. शिक्षण विभाग, शाळा व्यवस्थापन समित्या, पालक आणि ग्रामस्थ यांच्या सक्रिय सहभागातून शिक्षण लोकचळवळ व्हावे, असेही शिक्षण मंत्र्यांनी  अधोरेखित केले. विशेषतः जिल्ह्यातील शाळांमध्ये वाढती पटसंख्या पाहून त्यांनी समाधान व्यक्त करत, इतर भागांसाठी भंडारा जिल्हा आदर्श ठरावा, अशी अपेक्षा व्यक्त केली. भंडारा जिल्ह्यातील ‘आयडियल दहा शिक्षक’ ही संकल्पना उल्लेखनीय असून, ती संकल्पना संपूर्ण राज्यभर हजारो शिक्षकांपर्यंत पोहोचविण्याचा मानस त्यांनी व्यक्त केला.

………………………………………..
मराठी शिक्षणावर भर- राज्यगीत गाणे बंधनकारक
राज्यातील सर्व शाळांमध्ये राष्ट्रगीतानंतर राज्य गीत गाणे बंधनकारक आहे आणि खाजगी शाळांमध्येही मराठी शिक्षण अनिवार्य असतील, असे ठासून सांगत, संबंधित शाळांवर निरीक्षण करताना हे तपासण्याचे निर्देश त्यांनी अधिकाऱ्यांना दिले. जर कोणी नियमांचे उल्लंघन करत असेल, तर कठोर कारवाई करण्यात येईल, असा इशारा या बैठकीप्रसंगी त्यांनी दिला.  शिक्षणाचा दर्जा उंचावण्यासाठी विशेष निधी देण्यात येईल, अशी ग्वाही त्यांनी दिली. जिल्हा परिषद शाळांवर विषयांच्या अनुषंगाने असणारा अतिरिक्त शैक्षणिक भार कमी करण्यासाठी एक नवी कार्यपद्धती तयार केली जाणार आहे. शाळांमध्ये आधूनिक तंत्रज्ञान व एआय वापर सुरू असला तरी विद्यार्थ्यांची नाळ मातीशी तुटणार नाही याची जाणीवपूर्वक काळजी घेण्याचे आवाहन त्यांनी शिक्षकांना केले.
………………………………………..
 आरोग्य, देशभक्ती आणि शिष्यवृत्तीवर भर
 15 ऑगस्टपासून देशभक्तीपर गीते व कवायतींचे आयोजन, विद्यार्थ्यांची नियमित आरोग्य तपासणी, हेल्थ कार्डचे वितरण, तसेच चौथी, पाचवी, सातवी, आठवीतील विद्यार्थ्यांसाठी शिष्यवृत्ती परीक्षांचे आयोजन करून लाभार्थी संख्या वाढवण्याचे उद्दिष्टही त्यांनी जाहीर केले. भंडारा जिल्ह्यातील व्यसनमुक्ती उपक्रम स्तुत्य असून, तो संपूर्ण राज्यात लागू करता येईल यावर अभ्यास केला जात आहे. छोटे उपक्रम प्रभावी ठरतात, हे लक्षात घेऊन शासन परिपत्रकाद्वारे अंमलबजावणी करण्यात येणार आहे. इच्छाशक्ती असेल तर मार्ग नक्कीच सापडतो, असे सांगत शिक्षण मंत्र्यांनी शिक्षक व विद्यार्थ्यांच्या गुणांना वाव मिळावा यासाठी शिक्षकांना नवनवीन उपक्रम राबविण्याचे आवाहन केले.  तद्नंतर शालेय शिक्षण मंत्री दादाजी भूसे यांनी गणेशपूर येथील जिल्हा परिषद प्राथमिक शाळेला भेट दिली व मुलांशी संवाद साधला.