नवज्योत, प्रवक्ता अनंत याच्यासह ११ जहाल नक्षलवाद्यांचे आत्मसमर्पण

गोंदिया : महाराष्ट्र-मध्य प्रदेश-छत्तीसगड (एमएमसी) झोनमधील स्पेशल झोनल कमिटी मेंबर विकास नागपुरे ऊर्फ नवज्योतसह एकूण ११ नक्षलवाद्यांनी शुक्रवारी (दि.२८) गोंदिया जिल्हा पोलिसांसमोर आत्मसमर्पण केले. या ११ नक्षलवाद्यांवर शासनाचे एकूण ८९ लाख रुपयांचे बक्षीस होते.आत्मसमर्पण केलेल्या नक्षलवाद्यांत दरेकसा दलमच्या जहाल नक्षलवाद्यांचा समावेश आहे. विशेष म्हणजे ११ नक्षलवाद्यांनी एकाचवेळी आत्मसमर्पण करण्याची ही गोंदिया जिल्ह्यातील पहिलीच घटना आहे. महाराष्ट्र-मध्य प्रदेश-छत्तीसगड (एमएमसी) विशेष क्षेत्रीय समितीचा प्रवक्ता अनंत याने २४ नोव्हेंबरला आत्मसमर्पणाची तयारी दर्शवत १५ फेब्रुवारीपर्यंत मुदतपर्यंत मागितली होती.यानंतर छत्तीसगडचे गृहमंत्री विजय शर्मा यांनी सरकारकडे अधिक वेळ नाही, माओवाद्यांनी विनाविलंब शस्त्रे टाकून आत्मसमर्पण करावे, असे स्पष्टीकरण दिले होते. यानंतर २७नोव्हेंबरला माओवाद्यांनी नवे पत्रक जारी करत १ जानेवारी रोजी सर्वजण शस्त्रत्याग करून मुख्य प्रवाहात येऊ, असे जाहीर केले होते. मात्र, त्यापूर्वीच त्यांनी गोंदिया पोलिसांशी संपर्क साधला व आत्मसमर्पणाची तयारी दर्शविली.चार-पाच यासाठी मागील दिवसांपासून पोलिस यंत्रणा त्यांच्याशी संपर्कात होती, असे पोलिस उपमहानिरीक्षक गडचिरोली परिक्षेत्र अंकित गोयल यांनी शुक्रवारी (दि.२८) येथील पोलिस मुख्यालयात आयोजित पत्रकार परिषदेत सांगितले. पत्रकार परिषदेला जिल्हा पोलिस अधीक्षक गोरख भामरे, अपर पोलिस अधीक्षक अभय डोंगरे हे उपस्थित होते. गोंदिया जिल्ह्यात केवळ दरेकसा दलम कार्यरत होता.त्याच दलमच्या नलक्षवाद्यांनी अनंत याच्या नेतृत्वात शुक्रवारी आत्मसमर्पण केल्याने जिल्हा पूर्णपणे नक्षलवादमुक्त होण्याच्या मार्गावर असल्याचे जिल्हा पोलिस अधीक्षक गोरख भामरे यांनी सांगितले.

———————————

आत्मसमर्पण करणाऱ्या नक्षलवाद्यांत यांचा समावेश

अनंत ऊर्फ विकास ऊर्फ नवज्योत नागपूरे, ऊर्फ विनोद भास्कर रामास्वामी रा. बिडीडी चाळ वरळी मुबंई, वय ४०, रा. चिंताखुटा, जि. करीमनगर, तेलंगना, नागसु ऊर्फ गोलू ऊर्फ पांडू पुसू वडे, वय ३५, रा. तिरत्नागड, पो. स्टे. बांधे, जि. कांकेर, छ. ग., रानो ऊर्फ रम्मी ऊर्फ रामे येशू नरोटे, वय ३०, रा. पेठा, एओपी हालेवारा, ता. एटापल्ली, जि. गडचिरोली, तिजाऊराम, संतु ऊर्फ धरमसाय पोरेटी वय ३५ रा. पाटनवाढवी, कॅम्प पाटन, ता. मोहला, जि. राजनांदगाव, छ. ग. संगीता ऊर्फ शेवंती रायसिंग पंधरे, वय ३२, रा. रुपझर, कॅम्प बैहर, ता. बिरसा, जि. बालाघाट, म. प्र, अनुजा ऊर्फ नक्के सुकलू कारा, वय ५५, रा. डुंगरी परनाला, बस्तर, ता. बैरुगली, छ.ग., पूजा ऊर्फ जुगनी ऊर्फ सन्तु मुडियम, वय २७, रा. दल्ला. ता. उच्चुर, जि. बिजापुर, छ.ग., दिनेश ऊर्फ सादु पूलाई सोटी, वय ३०, रा. चिमेलू, जंगरगुंडा, जि. सुकमा, छ.ग., रामको/शिला चमरु मडावी (मधुची पत्नी), वय ४०, रा. कटेझरी, धानोरा, जि. गडचिरोली, अर्जुन ऊर्फ रितु भिमा दोड्डी, वय २०, रा. गुट्टोड, पो.स्टे बासलगुडा, जि. बिजापूर, छ. ग., प्रताप ऊर्फ समर ऊर्फ (सदस्य दर्रकसा एरिया काशीराम राजय्य बन्तुला, वय ६२ वर्षे, रा. सिगारावपेठ, पो.स्टे. रायकल, ता. जि. जगीतीयाल तेलंगणा आदींचा समावेश आहे.

——————————–

हिडमाच्या मृत्यूनंतर नक्षल चळवळ कमकुवत

जहाल नलक्षवादी हिडमा हा काही दिवसांपूर्वी चकमकीत ठार झाला होता. तेव्हापासून नक्षलवादी चळवळीला मोठा हादरा बसला असून नक्षल चळवळ आता पूर्णपणे कमकुवत झाली आहे. त्यामुळेच १ जानेवारीपर्यंत आत्मसमर्पणाची तयारी दर्शविणाऱ्या अनंतने मुदतीपूर्वी शस्त्र ठेवीत दरेकसा दलमच्या ११ नलक्षवाद्यांसह गोंदिया पोलिसांसमोर शुक्रवारी आत्मसमर्पण केले.0000000000000000