heavy rainfall : आभाळ फाटले; ५ जण बेपत्ता – अनेक जनावरे वाहिली
मुखेड तालुक्यात ढगफुटी; तिघांचा मृतदेह आढळला : पुरात १०० नागरिक अडकले, बचाव व शोधकार्य सुरू
नांदेड : मुखेड तालुक्यातील लेंडी धरणाच्या प्रभाव क्षेत्रामध्ये आणि लातूरच्या उदगीर तालुक्यात आणि कर्नाटकच्या बिदर तालुक्यात काल अतिवृष्टी झाली. जिल्ह्यातील मुक्रमाबाद मंडळात २०६ मी. मी पावसाची नोंद झाली. यामुळे लेंडीधरणाच्या प्रभावक्षेत्रातील रावणगाव, हसनाळ, भिंगोली, भासवाडी या गावामध्ये पाणी घुसले. ढगफुटीसदृश्य पावसामुळे हसनाळ येथील पाचजण बेपत्ता झाले होते, त्यापैकी तिघांचा मृतदेह सापडला आहे. अनेक जनावरे पाण्यात वाहून मृत्युमुखी पडले आहेत. जिल्ह्यातील शेतजमीनी खरडून गेल्या आहेत. अनेक गावांचा संपर्क तुटला आहे. एसडीआरएफच्या पथकाकडून शोध व बचावकार्य युध्दपातळीवर सुरू आहे. दरम्यान मुखेड तालुक्यातील हसनाळ येथील बेपत्ता झालेल्या पाच नागरिकांपैकी गंगाबाईन गंगाराम मादाळे (८०), भिमाबाईहिरामण मादाळे (७८), ललिताबाई भोसले (६०) यांचा मृतदेह सोमवारी आढळून आला आहे.
मुखेड तालुक्यातील रावणगावमध्ये २२५ नागरिक अडकले होते. हसनाळमध्ये ८ नागरिकांनी बुरुजावर आश्रय घेतला तर रावणगावमध्ये मशिदीवर ४ तर झाडांवर ८ नागरिक अडकले होते. भिंगोलीत साधारणः ४० नागरिक अडकले होते. यामुळे गंभीर समस्या निर्माण झाली होती. सकाळपासून महसूल व राज्य आपत्ती प्रतिसाद दलाची टीम कार्यरत आहे. यासोबतच पोलीसांची एक टीम कार्यरत असून आर्मीची एक टीम या गावामध्ये पोहोचली आहे. सकाळपासून सुरु झालेल्या एसडीआरएफ टिमने शोध व बचाव कार्य केले आहे. अजूनही रावणगावमध्ये ८० ते १०० लोक पुराच्या पाण्याने वेढलेले असून दोन तासात या नागरिकांची सोडवणूक करण्यात येणार आहे.
आतापर्यंत ५ नागरिक बेपत्ता असून त्यांचा शोध सुरु आहे. जनावरांचे मोठ्या प्रमाणात नुकसान झाले असल्याची माहिती जिल्हाधिकारी राहुल कर्डिले यांनी दिली.पैनगंगा प्रकल्पांची परिस्थिती नियंत्रणात आहे, परंतु पाण्याचा विसर्ग वाढू शकतो. नागरिकांना सतर्क राहण्याचे आवाहन जिल्हा प्रशासनाच्यावतीने करण्यात आले आहे. विष्णुपूरी प्रकल्पातून विसर्ग वाढल्यानंतर काही समस्या उदभवू नये यासाठी तेलंगनातील पाटबंधारे विभागाच्या सचिवाशी चर्चा करण्यात आली आहे. तसेच जिल्हा प्रशासन बिदर व लातूर जिल्हाधिकाऱ्यांच्या सतत संपर्कात आहे.
…….,…………………………….
विष्णुपूरी प्रकल्पाचे ९ गेट उघडले
जिल्ह्यात मागील तीन दिवसापासून सतत पाऊस सुरु आहे. अनेक तालुक्यात अतिवृष्टी झाली आहे. यामुळे विष्णुपूरी प्रकल्प क्षेत्रात पाऊस आणि विसर्ग दोन्हीही वाढले आहेत. विष्णुपूरी प्रकल्पाच्या वरच्या भागातील सिध्देश्वर व येलदरी धरण भरले आहेत. त्यांचा विसर्गही वाढलेला आहे. त्यामुळे विष्णुपूरी धरणाचे ९ गेट उघडले असून ९४ हजार क्युसेस वेगाने विसर्ग नदीपात्रात सोडण्यात आला आहे. हा विसर्ग आता वाढविण्यात येणार असून १ लाख २५ हजार क्युसेकने विसर्ग सोडण्यात येणार आहे.
…….,…………………………….
परिस्थितीवर मुख्यमंत्र्यांचे लक्ष
मुखेड तालुक्यातील अतिवृष्टीने लेंडी धरणाच्या पाणी पातळीत मोठी वाढ झाली आहे. शिवाय लातूर, उदगीर आणि कर्नाटकातून मोठ्या प्रमाणात पाणी येत आहे. काल येथे झालेला पाऊस सुमारे २०६ मि. मी. इतका होता. त्यामुळे रावणगाव, भासवाडी, भिंगेली, हासनाळी येथील जनजीवन प्रभावित झाले आहे. मी स्वतः नांदेड जिल्हाधिकाऱ्यांशी सातत्याने संपर्कात असून नांदेड, लातूर आणि बिदर असे तिन्ही जिल्हाधिकारी एकमेकांशी संपर्कात राहून बचाव कार्य करीत आहेत. एनडीआरएफची एक चमू, एक लष्करी पथक आणि पोलिसांचा चमू समन्वयातून बचाव कार्य करीत आहे. छत्रपती संभाजीनगर येथून सैन्याची एक तुकडी सुध्दा रवाना झाली आहे. स्थानिक प्रशासनाला सातत्याने प्रभावित भागात राहून समन्वय साधण्यास सांगण्यात आल्याचे मुख्यमंत्री देवेंद्र फडणवीस यांनी माध्यमांना कळविले.
