bhandara collector: १० वर्षांत दहा जिल्हाधिकारी बदलले; जिल्हाधिकारी डॉ. संजय कोलतेंची बदली सावन कुमार नवे जिल्हाधिकारी

भंडारा : तत्कालीन जिल्हाधिकारी योगेश कुंभेजकर यांच्या बदलीनंतर ५ सप्टेंबर २०२४ रोजी कार्यभार स्वीकारलेले जिल्हाधिकारी डॉ. संजय कोलते यांची मंगळवारी (दि. १२) बदली करण्यात आली. त्यांच्या जागी नंदूरबार जिल्हा परिषदचे मुख्य कार्यकारी अधिकारी सावन कुमार यांची जिल्हाधिकारी पदावर नियुक्ती झाली. गत १० वर्षांत जिल्हाधिकाऱ्यांची ही दहावी बदली असून जिल्ह्यातील एका जिल्हाधिकाऱ्याचा सरासरी कार्यकाल फक्त एका वर्षाचा ठरला आहे. साधारणपणे भारतीय प्रशासनिक सेवेतील कोणत्याही अधिकाऱ्याची बदली कार्यकाल पूर्ण होण्यापूर्वी होत नाही. मात्र, डॉ. कोलते यांचा बदली आदेश त्यांच्या एका वर्षाचा कार्यकाल पूर्ण होण्यापूर्वीच देण्यात आला. डॉ. कोलते यांनी सुमारे ११ महिन्यांच्या कार्यकाळात महसूल विभागाच्या कामकाजात गती आणली होती. नुकतेच महसूलमंत्री चंद्रशेखर बावनकुळे यांनी जिल्ह्यात एग्रीस्टॅक प्रकल्पाचे ८४ टक्के काम पूर्ण झाल्याबद्दल त्यांचे कौतुक केले होते. तसेच गेल्या आठवड्यात साजऱ्या झालेल्या ‘महसूल सप्ताहात’ अनेक नागरिकांनी लाभ घेतला. स्वातंत्र्यदिनाच्या तयारीदरम्यान झालेल्या या बदलीमुळे महसूल विभागासह नागरिकांमध्ये चर्चाना उधाण आले आहे.