गुरु तेग बहादूर यांच्या 350 व्या शहिदी समागमनिमित्त नागपुरात होणाऱ्या कार्यक्रमास संबंधित समाजाचे असणार सहकार्य

जिल्हाधिकारी यांच्या अध्यक्षतेत शहिदी समागमनची आढावा बैठक

गोंदिया : ‘हिंद दी चादर श्री गुरु तेग बहादूर’ यांच्या 350 व्या शहिदी समागम शताब्दी वर्षानिमित्त 7 डिसेंबर 2025 रोजी नागपूर येथे उत्तर प्रदेशचे मुख्यमंत्री योगी आदित्यनाथ यांच्या उपस्थितीत कार्यक्रमाचे आयोजन करण्यात येणार आहे. त्यानिमित्ताने सदर कार्यक्रमास उपस्थित राहण्यासाठी जिल्ह्यातील शिख, सिकलीगर, बंजारा, लबाना, मोहयाल, सिंधी समाजातील प्रतिनिधींनी सर्व प्रकारचे सहकार्य करण्याचे जिल्हाधिकाऱ्यांना सहमती दर्शवली. आज जिल्हाधिकारी प्रजित नायर यांच्या अध्यक्षतेत आढावा बैठक घेण्यात आली.  या बैठकीस निवासी उपजिल्हाधिकारी भैय्यासाहेब बेहेरे, अधिष्ठाता डॉ.कुसुमाकर घोरपडे, शिक्षणाधिकारी (माध्यमिक) संदेश जाधव, शिक्षणाधिकारी (प्राथमिक) विशाल डोंगरे, तहसिलदार देवरी महेंद्र गणवीर, तहसिलदार सालेकसा नरसय्या कोंडागुर्ले, पोलीस निरिक्षक चंद्रकांत काळे, परमजीतसिंग मुलकसिंग भाटिया, सतविंदरसिंह अमोलकसिंह भाटिया, शालेंद्रसिंग टाक, उत्तरसिंग, गजेंदरसिंग भाटिया, प्रितसिंग गुलाटी, हरजीतसिंग जुनेजा, प्रदिप राठोड उपस्थित होते.  श्री गुरु तेग बहादूर यांची शहादत व योगदान हे धर्म आणि मानवतेच्या रक्षणाचे तेजस्वी प्रतिक आहे. या कार्यक्रमाच्या माध्यमातून त्यांच्या शौर्याचा आणि श्रध्देचा गौरव करण्यात येणार आहे. या कार्यक्रमामुळे सदर समाजाच्या गौरवशाली, पराक्रमी आणि धर्मनिष्ठ इतिहासाला नवे बळ मिळणार असून गुरु बंधुत्वाचा हा पवित्र वारसा पुढील पिढ्यांसाठी प्रेरणादायी ठरणार आहे. यानिमित्ताने श्री गुरु तेग बहादूर यांचे शहादत व देश रक्षणासाठीचे योगदान माहिती करुन देण्यासाठी गोंदिया जिल्ह्यातील शाळेत विद्यार्थ्यांना व्हिडिओ क्लिपद्वारे त्यांचा इतिहास दाखविण्यात येत आहे, अशी माहिती बैठकीत देण्यात आली.